ମନମୋହନ ସିଂଙ୍କୁ କ୍ଷମା ମାଗନ୍ତୁ ମୋଦୀ: ସିବିଆଇ ଏୟାର ଇଣ୍ଡିଆ ମାମଲା ବନ୍ଦ କରିବା ପରେ କଂଗ୍ରେସର ଦାବି
ନୂଆଦିଲ୍ଲୀ: ଏୟାର ଇଣ୍ଡିଆ ଜମି ଲିଜ୍ ସ୍କାମ ମାମଲାରେ ସିବିଆଇ କ୍ଲୋଜର ରିପୋର୍ଟ ଦାଖଲ କରିଛି। ଫଳରେ ଏହି ମାମଲା ବନ୍ଦ ହୋଇଛି। ଅଭିଯୋଗ ହୋଇଥିଲା ଯେ ୟୁପିଏ ସରକାର ସମୟରେ ଏୟାର ଇଣ୍ଡିଆର ଲିଜ୍ ପ୍ରସଙ୍ଗରେ ଅନିୟମିତତା ଯୋଗୁ ପ୍ରାୟ ୮୬୦କୋଟି ଟଙ୍କା କ୍ଷତି ଘଟିଥିଲା। ସିବିଆଇ ମାମଲାର କ୍ଲୋଜର ରିପୋର୍ଟ ଦାଖଲ କରିବା ପରେ ବର୍ତ୍ତମାନ କଂଗ୍ରେସ କହିଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କୁ କ୍ଷମା ମାଗନ୍ତୁ। ଦୁର୍ନୀତି ଅଭିଯୋଗର ମିଥ୍ୟା ଅଭିଯୋଗ ୟୁପିଏ ସରକାର ବିରୋଧରେ କରାଯାଇଥିଲା। ମୋଦୀ ସରକାର ମଧ୍ୟ ଏନେଇ ଦେଶର ଲୋକଙ୍କ ନିକଟରେ କ୍ଷମା ମାଗିବା ଉଚିତ୍।
କଂଗ୍ରେସର ବରିଷ୍ଠ ନେତା ଜୟରାମ ରମେଶ କହିଛନ୍ତି ଅଜିତ ପାୱାର ଗୋଷ୍ଠୀ ଏବଂ ଭାରତୀୟ ଜନତା ପାର୍ଟି(ବିଜେପି) ମଧ୍ୟରେ ମେଣ୍ଟ ଯୋଗୁ ଏହି ମାମଲା ବନ୍ଦ ହୋଇଯାଇଛି। ସେ କହିଛନ୍ତି ୨୦୧୪ ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଅଭିଯୋଗ ସ୍କାମ ଉପରେ ସିଏଜି ରିପୋର୍ଟ ନେଇ ସବୁଆଡେ ଯାଉଥିଲେ।ଗୋଟିଏ ଦିନ ପୂର୍ବରୁ ସିବିଆଇ ଏହି ମାମଲାର କ୍ଲୋଜର ରିପୋର୍ଟ ଦାଖଲ କରିଥିଲା କାରଣ ଏନସିପିର ପ୍ରଫୁଲ୍ଲ ପଟେଲ ବିଜେପିରେ ଯୋଗ ଦେଇଥିଲେ। ସେମାନେ ବିଜେପିର ୱାଶିଂ ମେସିନରେ ଧୋଇ ସଫା ହୋଇଯାଇଛନ୍ତି ବୋଲି କଂଗ୍ରେସ କହିଛି। ସେ କହିଛନ୍ତି, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପୂର୍ବତନ ପ୍ରଧାନମନ୍ତ୍ରୀ ଡକ୍ଟର ମନମୋହନ ସିଂ ଏବଂ ସମଗ୍ର ଦେଶକୁ ଏହି ମିଥ୍ୟା ମାମଲା କରାଯାଇଥିବାରୁ କ୍ଷମା ମାଗିବା ଉଚିତ୍। ସେ ପଚାରିଛନ୍ତି ମନମୋହନ ସିଂଙ୍କ ବିରୋଧରେ କେଉଁ ଆଧାରରେ ଅଭିଯୋଗ କରାଯାଇଥିଲା? ନିଜର ରାଜନୈତିକ ସ୍ୱାର୍ଥ ହାସଲ ପାଇଁ ବିଜେପି ପକ୍ଷରୁ ଭୁଲ ତଥ୍ୟ ଉପସ୍ଥାପନ କରାଯାଇଥିଲା |