ଶାହାଙ୍କ ନକଲି ଭିଡିଓ ମାମଲାରେ ୩ ଦିନିଆ ପୁଲିସ ହେପାଜତରେ ଗଲେ କଂଗ୍ରେସ ନେତା ଅରୁଣ ରେଡ୍ଡୀ
ନୂଆଦିଲ୍ଲୀ: କେନ୍ଦ୍ର ଗୃହମନ୍ତ୍ରୀ ଅମିତ ଶାହାଙ୍କର ନକଲି ଭିଡିଓ ବନାଇବା ମାମଲାରେ ‘ସ୍ପିରିଟ୍ ଅଫ୍ କଂଗ୍ରେସ’ର ଏକ୍ସ ଆକାଉଣ୍ଟ୍କୁ ପରିଚାଳନା କରୁଥିବା ତଥା ଦଳର ସୋସିଆଲ ମିଡିଆ ଜାତୀୟ ସଂଯୋଜକ ଥିବା କଂଗ୍ରେସ ନେତା ଅରୁଣ ରେଡ୍ଡୀଙ୍କୁ ୩ ଦିନିଆ ପୁଲିସ ହେପାଜତକୁ ପଠାଯାଇଛି।
ଶୁକ୍ରବାର ବିଳମ୍ବିତ ରାତିରେ ଦିଲ୍ଲୀ ପୁଲିସର ଆଇଏଫଏସଓ ୟୁନିଟ୍ ତାଙ୍କୁ ଗିରଫ କରିବା ପରେ ୩ ଦିନିଆ ହେପାଜତକୁ ପଠାଯାଇଥିବା ସୂଚନା ରହିଛି। ଶାହାଙ୍କର ନକଲି ଭିଡିଓରେ ଦେଖିବାକୁ ମିଳିଥିଲା ଯେ ସେ ବିଜେପି ଦେଶର ସଂରକ୍ଷଣ ବ୍ୟବସ୍ଥା ବିରୋଧୀ ବୋଲି କହୁଛନ୍ତି।
ତେବେ ବାସ୍ତବରେ କଂଗ୍ରେସ ଶାସିତ ତେଲେଙ୍ଗାନାରେ ଏକ ସାଧାରଣ ସଭାରେ ତାଙ୍କ ଅଭିଭାଷଣରେ ଅମିତ ଶାହା କହିଛନ୍ତି, “ଯଦି ବିଜେପି ଏଠାରେ ସରକାର ଗଠନ କରେ, ତେବେ ଆମେ ମୁସଲମାନମାନଙ୍କ ପାଇଁ ଅସାମ୍ବିଧାନିକ ସଂରକ୍ଷଣ ପ୍ରତ୍ୟାହାର କରିବୁ। ଆମେ ନିଶ୍ଚିତ କରିବୁ ଯେ ଅନୁସୂଚୀତ ଜାତି, ଅନୁସୂଚୀତ ଜନଜାତି ଏବଂ ଅନ୍ୟ ପଛୁଆ ବର୍ଗର ଲୋକ ସମ୍ବିଧାନ ଅନୁଯାୟୀ କୋଟା ପ୍ରାପ୍ତ କରନ୍ତୁ।’’