ତଦନ୍ତକାରୀ ସଂସ୍ଥା ଓ ଅରବିନ୍ଦ କେଜ୍ରିୱାଲଙ୍କ ଓକିଲଙ୍କୁ ପ୍ରସ୍ତୁତ ରହିବାକୁ କହି କହିଲେ କୋର୍ଟ; ନିର୍ବାଚନ ପୂର୍ବରୁ ମିଳିବ କି ଜାମିନ?

ନୂଆଦିଲ୍ଳୀ: ଲୋକସଭା ନିର୍ବାଚନକୁ ଦୃଷ୍ଟିରେ ରଖି ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କୁ ଅନ୍ତରୀଣ ଜାମିନ ଦେବାର ସମ୍ଭାବନା ଉପରେ ସୁପ୍ରିମକୋର୍ଟ ବିଚାର କରିବେ । ଜଷ୍ଟିସ ସଞ୍ଜୀବ ଖାନ୍ନା ଓ ଜଷ୍ଟିସ ଦୀପଙ୍କରଙ୍କୁ ନେଇ ଗଠିତ ଖଣ୍ଡପୀଠ ଅନ୍ତରୀଣ ଜାମିନ ଆବେଦନର ଶୁଣାଣି କରିବେ ବୋଲି କହିଛନ୍ତି । କୋର୍ଟ ତଦନ୍ତକାରୀ ସଂସ୍ଥା ପ୍ରବର୍ତ୍ତନ ନିର୍ଦ୍ଦେଶାଳୟ ଏବଂ ଅରବିନ୍ଦ କେଜ୍ରିୱାଲଙ୍କ ଓକିଲଙ୍କୁ ପ୍ରସ୍ତୁତ ରହିବାକୁ କହିଛନ୍ତି ।

ଅରବିନ୍ଦ କେଜ୍ରିୱାଲଙ୍କ ଅନ୍ତରୀଣ ଜାମିନ ଉପରେ ଆସନ୍ତା ୭ ତାରିଖରେ ଶୁଣାଣି କରିବେ ସୁପ୍ରିମକୋର୍ଟ । ନିର୍ବାଚନ କାରଣରୁ ସୁପ୍ରିମକୋର୍ଟ ତାଙ୍କ ଅନ୍ତରୀଣ ଜାମିନ ଉପରେ ବିଚାର କରିବେ । ପରବର୍ତ୍ତୀ ଶୁଣାଣିରେ ଅନ୍ତରୀଣ ଜାମିନର ସର୍ତ୍ତ ଜଣାଇବାକୁ ସୁପ୍ରିମକୋର୍ଟ ପ୍ରବର୍ତ୍ତନ ନିର୍ଦ୍ଦେଶାଳୟକୁ କହିଛନ୍ତି । ମଙ୍ଗଳବାର ପୂର୍ବାହ୍ନ ସାଢ଼େ ୧୦ଟାରେ ଏହି ମାମଲାର ଶୁଣାଣି ହେବ ବୋଲି ସୁପ୍ରିମ୍ କୋର୍ଟ କହିଛନ୍ତି । ଅଦାଲତ କହିଛନ୍ତି ଯେ ଯଦି ଏହି ମାମଲା ଦୀର୍ଘ ଦିନ ଧରି ଚାଲିବ, ତେବେ ଆମେ ଅନ୍ତରୀଣ ଜାମିନ ଉପରେ ବିଚାର କରିବୁ । କେଜ୍ରିୱାଲ ଜେଲରୁ ଅଫିସିଆଲ ଫାଇଲରେ ଦସ୍ତଖତ କରିପାରିବେ କି ବୋଲି ଦ୍ୱିତୀୟ ପ୍ରଶ୍ନରେ ସୁପ୍ରିମକୋର୍ଟ ଇଡିକୁ ଜବାବ ମାଗିଛନ୍ତି । ଦିଲ୍ଲୀର ଅବକାରୀ ନୀତିରେ ଅନିୟମିତତା ଅଭିଯୋଗରେ ଆମ୍ ଆଦମୀ ପାର୍ଟି ମୁଖ୍ୟଙ୍କୁ ମାର୍ଚ୍ଚ ୨୧ରେ ଗିରଫ କରାଯାଇଛିି ।

ନିମ୍ନ ଅଦାଲତରୁ ଆଶ୍ୱସ୍ତି ନ ମିଳିବାରୁ କେଜ୍ରିୱାଲ ସୁପ୍ରିମକୋର୍ଟରେ ପହଂଚିଛନ୍ତି । ମନୀଷ ସିସୋଦିଆ ଏବଂ ସଞ୍ଜୟ ସିଂହଙ୍କ ପରେ ଦୁର୍ନୀତି ମାମଲାରେ ଗିରଫ ହୋଇଥିବା ସେ ହେଉଛନ୍ତି ତୃତୀୟ ପ୍ରମୁଖ ଆପ୍ ନେତା । ରାଜ୍ୟସଭା ସାଂସଦ ସଞ୍ଜୟ ସିଂହ ଙ୍କୁ ଜାମିନରେ ମୁକ୍ତ କରାଯାଇଛି । ଅରବିନ୍ଦ କେଜ୍ରିୱାଲଙ୍କ ଓକିଲ ଅଭିଷେକ ସିଂଘଭି କହିଛନ୍ତି ଯେ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ବିରୋଧରେ କୌଣସି ପ୍ରମାଣ ନାହିଁ ଏବଂ ତାଙ୍କ ଗିରଫଦାରୀ ବେଆଇନ । କେଜ୍ରିୱାଲ ଇଡିର ୯ଟି ସମନର ଜବାବ ଦେଇଥିଲେ । ହାଜର ନ ହେବା ଗିରଫଦାରୀର କାରଣ ହୋଇପାରିବ ନାହିଁ ବୋଲି ସେ କହିଛନ୍ତି ।