ଗୁଆଙ୍ଗଝୋରେ ଘୂର୍ଣ୍ଣିବଳୟର ତାଣ୍ଡବ: ୫ ମୃତ, ୩୩ ଆହତ, ୧୦୦ରୁ ଅଧିକ କାରଖାନା କ୍ଷତିଗ୍ରସ୍ତ
ବେଜିଂ: ଦକ୍ଷିଣ ଚୀନ୍ର ଗୁଆଙ୍ଗଝୋରେ ହୋଇଥିବା ଘୂର୍ଣ୍ଣିବଳୟରେ ପାଞ୍ଚ ଜଣଙ୍କର ମୃତ୍ୟୁ ଘଟିଛି। ଅନ୍ୟ ୩୩ ଜଣ ଆହତ ହୋଇଛନ୍ତି। ଚୀନ୍ର ସରକାରୀ ଗଣମାଧ୍ୟମ ଆଧାରରେ ସିଏନଏନ ଏହି ସୂଚନା ଦେଇଛି।ଏକ କୋଟି ୯୦ ଲକ୍ଷ ଜନସଂଖ୍ୟା ବିଶିଷ୍ଟ ଗୁଆଙ୍ଗଝୋ ସହର ସ୍ତର-୩ ତୀବ୍ରତା ଘୂର୍ଣ୍ଣିବଳୟର ସମ୍ମୁଖୀନ ହୋଇଛି। ଏହା ସର୍ବୋଚ୍ଚ ସ୍ତର-୫ ଠାରୁ ଦୁଇ ଗୁଣ କମ୍ ରହିଥିଲା ବୋଲି ଗଣମାଧ୍ୟମ କହିଛି। ଜିନହୁଆ ନ୍ୟୁଜ୍ ଏଜେନ୍ସି ଅନୁଯାୟୀ ଅଧିକାରୀମାନେ କହିଛନ୍ତି ଘୂର୍ଣ୍ଣିବଳୟ ଯୋଗୁଁ ୧୪୧ କାରଖାନା କୋଠା ନଷ୍ଟ ହୋଇଯାଇଛି। କିନ୍ତୁ କୌଣସି ଆବାସିକ ଘର ଭୁଶୁଡି ନାହିଁ।
ବାୟୁନ୍ ଜିଲ୍ଲାର ଲିଆଙ୍ଗଟିଆନ୍ ଗାଁର ପାଣିପାଗ କେନ୍ଦ୍ର ପ୍ରତି ସେକେଣ୍ଡରେ ସର୍ବାଧିକ ୨୦.୬ ମିଟର ପବନ ବହିବା ରେକର୍ଡ କରିଛି। ଉଦ୍ଧାର ଓ ରିଲିଫ୍ କାର୍ଯ୍ୟ ସ୍ଥାନୀୟ ସମୟ ରାତି ୧୦ ଟା ଶେଷ ହୋଇଥିଲା। ଘୂର୍ଣ୍ଣିବଳୟ ପରେ ଦକ୍ଷିଣ ଚାଇନାରେ ପ୍ରବଳ ବର୍ଷା ହୋଇଥିଲା। ଯେଉଁ କାରଣରୁ ବନ୍ୟା ପରିସ୍ଥିତି ସୃଷ୍ଟି ହୋଇଛି। ଲକ୍ଷ ଲକ୍ଷ ଲୋକଙ୍କ ଜୀବନ ବିପଦରେ ପଡ଼ିଛି। ଉଦ୍ଧାର କର୍ମଚାରୀମାନେ ପାଣିରେ ଫସି ରହିଥିବା ବାସିନ୍ଦାଙ୍କୁ ସ୍ଥାନାନ୍ତର କରୁଛନ୍ତି। ଗୁଆଙ୍ଗଡୋଙ୍ଗ ପ୍ରଦେଶରେ ବନ୍ୟା ଯୋଗୁଁ ୧୧,୧୦,୦୦୦ରୁ ଅଧିକ ଲୋକଙ୍କୁ ସ୍ଥାନାନ୍ତର କରାଯାଇଛି।
ଏହି ସପ୍ତାହ ପୂର୍ବରୁ, ରାଜ୍ୟ ଗଣମାଧ୍ୟମ ରିପୋର୍ଟ କରିଥିଲା ଯେ ବନ୍ୟାରେ ଗୁଆଙ୍ଗଡୋଙ୍ଗରେ ୪ ଜଣ ପ୍ରାଣ ହରାଇଛନ୍ତି। ଏପ୍ରିଲ୍ ୧୬ ଠାରୁ, ଲଗାତାର ପ୍ରବଳ ବର୍ଷା ଚାଇନାର ଉତ୍ପାଦନ କେନ୍ଦ୍ର ତଥା ଦେଶର ଅନ୍ୟତମ ଜନବହୁଳ ଅଞ୍ଚଳ ପର୍ଲ ରିଭର ଡେଲ୍ଟାକୁ ପ୍ରଭାବିତ କରିଛି ଏବଂ ଗୁଆଙ୍ଗଡୋଙ୍ଗର ଚାରିଟି ପାଣିପାଗ କେନ୍ଦ୍ର ଏପ୍ରିଲ୍ ପାଇଁ ରେକର୍ଡ ପରିମାଣର ବର୍ଷା ରେକର୍ଡ କରିଛି ବୋଲି ସିଏନଏନ ପକ୍ଷରୁ ଖବର ପ୍ରକାଶ ପାଇଛି।